How Powerful Baba Kaal bhairav is??

 Not Just a God, a Guardian – The Truth About Kaal Bhairav in Varanasi

By Vishnu Gupta

    🙏🙏 Mahadev Readers🙏🙏

 

In most mandir, log blessings lene jaate hain…lekin Kaal Bhairav jii ke darbaar mein, log apne upar raksha likhwaane jaate hain. Unka darshan kisi soft bhakti ka part nahi —woh ek taaqat ka samna hai.
Woh Shiv ka woh roop hain jo muskurate nahi, par dekh kar samjha dete hain — “Main hoon yahan.”  Bhairav jii  phool nahi maangte. Woh sachchai maangte hain.

Kashi mein har kisi ko ek baat pata hoti hai —jab tak Bhairav jii ka kala dhaaga haath mein hai,
tab tak na bura waqt chhoo sakta hai, na koi bura nazar. Yahan Baba Vishwanath Raja hain…lekin darbaar ka asli control Bhairav jii ke paas hota hai. Woh Kashi ke Kotwal hain — aur Kotwal ki raza ke bina,na yahan koi tikta, na chhipta, na mar paata.

Yeh blog un logon ke liye nahi hai jo sirf kahaniyan padhte hain… yeh unke liye hai jo raat ke sannate mein Bhairav ke saamne khade ho chuke hain —aur mehsoos kiya hai woh aankhon ka sankalp, woh sanatan ki shakti. Kyunki Bhairav bhagwan jaise nahi lagte… woh apne jaise lagte hain.

Kabhi pita jaise daant dete hain,

kabhi bhai jaise peeth thokte hain,

aur kabhi dost jaise keh jaate hain —

"Tu bas sachcha reh, main sab dekh raha hoon."

 

🔥 Kaun Hain Kaal Bhairav Ji – Katha, Roop Aur Tattva

Kaal Bhairav Ji sirf ek devta nahi hain — woh samay ke niyanta hain. Unka naam hi sab kuch keh jaata hai: ‘Kaal’ matlab samay. ‘Bhairav’ matlab bhay ko harne wale. Yaani jo samay ke upar hain, aur jo bhay se mukti dete hain.

Unki katha Mahadev se judi hui hai. Kehte hain, jab Brahma Ji ne ahankaar mein chaar mukh bana liye, toh Shiv Ji ne Bhairav Ji ke roop mein ek mukh kaat diya.
Us paap ke prashchit ke roop mein, Bhairav Ji ban gaye Kashi ke rakshak.

Tab se aaj tak, Kashi mein jab tak Bhairav Ji ki raza na ho, na jeevan tikta hai, na mrityu shant hoti hai.

"Kehte hain… Kashi mein marna bhi tabhi moksha deta hai,
jab Bhairav Ji us praan ko swayam Baba Vishwanath Ji ke darbaar tak le jaayein."

Bhairav Ji ka roop bhayankar hai — gale mein mundmala, haath mein trishul, aankhon mein agni. Lekin unka darshan sirf bhay se nahi — shuddhi aur sachchai ke path se hota hai.
Woh darwaza nahi band karte — woh andar jaane ka rasta dete hain… magar sachche dil se.

Kashi mein log kehte hain —

"Baba Vishwanath Raja hain, lekin Kashi ka raaj Bhairav Ji chalate hain."

Aur isi liye har yatra, Bhairav Ji ke darshan ke bina adhoori hai.

 

🧿 Kaal Bhairav Ji – Kashi Ke Kotwal, Kashi Ke Sanrakshak

🧿 Kaal Bhairav Ji Kashi ke liye bhagwan nahi...

•   Woh niyam hain.
• Woh ek seema hain.
• Woh shuddhi ka dwar hain.
• Woh Shiv ke sheher ke pehredaar hain.

Kashi mein Baba Vishwanath ke darshan se pehle Bhairav Ji ka darshan karna niyam hai —
kyunki jab tak Kashi ke Kotwal aapko manzoori na dein, tab tak Shiv ke sheher mein pravesh adhura rehta hai.

“Bhairav Ji dekhte hain ki aap ka man kaisa hai,

aur tab decide karte hain — aap andar jaane laayak ho ya nahi.”

Yeh unka gussa nahi hai, yeh unka dharm hai — Kashi ke maryada ko bachaye rakhna. Jis sheher mein mrityu bhi moksha ban jaaye, wahaan Bhairav Ji woh darwaza hain jahan se har praan ko guzarna padta hai.

Kisi ki nazar lage,

kuch bura chhoo le,

ya andhera se v ghoor andhera aa jaye —

log seedha kehte hain: “Ek baar Bhairav Ji ke darbaar jaa, sab theek ho jaayega.”

Unka darbar koi emotional jagah nahi — woh ek energy point hai, jahan bhoot, vighna, paap, aur dar swayam thahar jaate hain."Bhairav Ji Shiv ka woh roop hain jo maun mein bhi sab kuch dekhte, sunte, aur rok dete hain."

Yeh samajhna zaruri hai:
Kashi mein rehne ka, marne ka, aur mukti paane ka hak tabhi milta hai, jab Kaal Bhairav Ji aapko apni nazar se guzarte hue dekh lete hain — aur chhupte nahi.

🧿 Jab Tak Bhairav Ji Na Chahein, Koi Kashi Mein Nyay Nahi Kar Sakta

Kashi mein sirf bhakti nahi chalta… yahan maryada chalti hai.
Aur is sheher ki maryada ke rakhwale ek hi hai —
Baba Kaal Bhairav Ji.

Yahan ek niyam hai — chahe police ka naya afsar ho, commissioner ho, MLA ya MP…koi bhi apni duty tab tak shuru nahi karta, jab tak Baba Kaal Bhairav Ji se agya na le le. Yeh sirf bhakti nahi, Kashi ka system hai. Modi Ji khud jab Varanasi se MP bane, toh naamankan se pehle bhi Bhairav Ji ke darbaar aaye, aur jeetne ke baad bhi sabse pehle aashirvaad lene aaye.

Kashi mein asli power Baba ke paas hoti hai…

baaki sab sirf seva mein hain.

Jo yahan kuch banna chahta hai,

pehle unko jhukna padta hai.

Jo hai... Baba hi hai

Commissioner office mein bhi ek seat hoti hai Bhairav Ji ke liye. Photo nahin… prakash hota hai wahan. Unka naam likha hota hai, aur samaan se woh kursi khali chhodi jaati hai — kyunki woh sheher ke asli niyamak hain.

Jab Bhairav Ji ki photo office mein hoti hai,

toh kanoon ke haath lambe nahi —

seedhe, saaf, aur sachche ho jaate hain.

Kehna aasaan hai — Kashi mein kanoon Bhairav Ji chalate hain. Afsar sirf unka haath banta hai.

Woh judge bhi hain, jailor bhi.

Woh danda bhi hain, aur daya bhi.

Aur jab koi sachcha hota hai,

toh Bhairav Ji khud uske saath khade hote hain.

🚩 Chaliye, Ab Main Aapko Batata Hoon – Main Bhairav Ji Ka Darshan Kab Aur Kaise Karta Hoon

Agar aap yeh padh rahe ho…toh main maan ke chal raha hoon ki aapne mera pichla blog zarur padha hoga —jisme maine bataya tha ki main raat 10 baje ke baad kaise Baba Vishwanath  ka darshan karta hoon.
🌙 My Favorite Hour in Kashi – A Spiritual Solo Journey after 10 PM

[Yahan click karein – ‘Baba’]

Toh jaise hi main Baba Vishwanath Ji ki Shayan Aarti mein unhe sula deta hoon, ek sukoon se bhar jaata hai mann. Na kuch maangta hoon, na kuch sochta hoon…bas shabd nikalta hai — 🕉️ “Namah Parvati Pataye, Har Har Mahadev!”

Fir main nikal padta hoon —apni scooty pe, bina kisi GPS ke, sirf Bhakti aur aadat ke sahare.

 Main nikalta hoon Annapurna Gali se…jahaan se   shakti ka aashirvaad milta hai, aur aage badhta hoon, Gate No. 4 ko paar karte hue — Chowk Thane ki taraf.  Raat ka waqt hota hai…bazaar band hota hai,   lekin  andar ek alag hi jagran chalu hota hai —jo   sirf Bhairav Ji tak pahuchne wale samajh sakte   hain. Raat ka samay hota hai, hawaa thodi thandi hoti hai, aur scooty ka accelerator dheere chalaata hoon —   kyunki yeh raasta safar ban jaata hai jab manzil   Bhairav Ji ho.

 

Kisi aur sheher mein raat ka safar akelapan deta hai…

Banaras mein woh safar Bhairav Ji tak le jaata hai.

🧿 Aur Main Pahuchta Hoon... Kashi Ke Kotwal Ke Darbaar Mein

Galiyon ka shor peechhe chhoot jaata hai… aur Bhairav Ji ka sannata aage badhne se pehle rukne ko kehta hai. Main apni scooty ek kone mein laga deta hoon — koi jaga fix nahi hoti, par man ke andar ek jagah tay hoti hai. Wahan se chal kar jaata hoon un dhoondhli si roshniyon ke beech, jahaan kuch log baith ke jap kar rahe hote hain, kuch bas aankhen bandh karke darshan mein doobe hote hain.

Darbaar ke bahar se hi aankhon ka bhaav badal jaata hai.
Dil halka ho jaata hai.
Bhasha band ho jaati hai.
Aur aatma bolne lagti hai.

Unki murti ghoor roop mein hoti hai —mundmala gale mein, trishul haath mein, aur aankhon mein aisi shakti… ki jhooth wahi ke wahi gir jaata hai.

Main jhukta hoon — na dikhawa hai, na dar.

Sirf ek aisa jhukna, jahan mann ke saare bhaar gir jaate hain.

Jo galtiyaan hui hoti hain,

woh bolne se pehle hi Bhairav Ji sun lete hain.

Unke saamne koi mantra ya paath yaad nahi rehta…
sirf ek vishwas hota hai —ki agar yahan tak aaya hoon, toh ab sab kuch samarpan hai.

🙏 Meri Ek Hi Prarthana Hoti Hai...

Main kuch maangta nahi hoon. Na dhan, na sukh, na yash. Main sirf ek baat kehkar Bhairav Ji ke charnon mein baith jaata hoon:

"Hey Baba Kaal Bhairav…

Aapki ichha se,

aapki daya se,

aur aapki agya se hi main Kashi mein niwas kar raha hoon.

Aapko jo theek lage,

jo mere liye uchit ho,

bas wahi kariyega.

Main aapka hoon,

aur mujhe apna hi samajhiye."

Itna keh kar…mantra jaisa bas ek hi vaakya nikalta hai mere mukh se:

 🕉️ “Namah Parvati Pataye, Har Har Mahadev!”

Us pal mein kuch aur reh nahi jaata —na prarthana, na pehchaan. Bas ek main, aur Baba Bhairav Ji ka darbaar.

🔱 Darshan Ke Baad – Parikarma, Navgrah Aur Baba Ki Sawari

Baba Bhairav Ji ke darshan ke baad main seedha bahar nahi nikalta…yatra yahi khatam nahi hoti — abhi usse poora karna hota hai. Main teen parikarma karta hoon Bhairav Ji ke charnon ke chaaro taraf —har parikrama mein ek alag bhaav hota hai, ek alag sankalp.

🌀 Pehli Parikrama – Navgrah Ki Pradakshina

Jaise hi pehla chakkar shuru karta hoon, main sidhe jaata hoon Navgrah ke paas — wo stambh jahan grahon ki moortiyan virajmaan hain. Wahan ek chakra hota hai, usse ek baar ghumata hoon — prithvi, aakash, samay aur grah shuddh ho jaayein is bhaav se.

“Grahaon ka asar tabhi hota hai
jab mann chanchal ho.
Aur Bhairav Ji ke darshan ke baad
toh man swayam sthir ho jaata hai.”

 

🔁 Dusri Aur Tisri Parikrama – Darshan Teen Dwaron Se

Main fir apna chakkar jaari rakhta hoon, aur Bhairav Ji ka darshan har gate se karta hoon — teen alag nazar, teen alag anubhav. Kabhi saamne se, kabhi kone se, aur har baar ek hi bhaav —“Tu dekh raha hai na Baba?”

🚪 Aur Fir Ant Mein... Mahadev Ka Darshan Darwaze Par

Jab teen parikramayein poori ho jaati hain, aur main mandir se bahar nikalne lagta hoon,tabhi main ruk jaata hoon ek chhoti si murti ke saamne —  jo Mahadev ke roop mein bilkul gate ke paas virajmaan hai. Unka aashirwad leta hoon — kyunki Bhairav ke baad Shiv ka touch milna ek pavitra samapan ka bhaag hai. Aur fir Bhairav Ji ki sawari ka darshan karta hoon — woh bhayankar roop, lekin bhakton ke liye ashcharya ka rakshak.

Itna karne ke baad... na man mein kuch bacha hota hai, na samay ka ahsaas — sirf ek vishwas hota hai ki aaj raat main Kashi ke niyam ke saath jee raha hoon.

Fir main Baba ko kehta hoon — "Good night Baba…"

Na mazak mein, na casual… bilkul usi tarah jaise ek rakshak ko duty ke baad saluting karte hain.Jaise keh raha hoon —

"Ab main jaa raha hoon Baba…
par aap toh jaagte rahoge na?"

Mandir ka gate band hota hai, lekin lagta hai jaise unki drishti us jaliyon ke paar se bhi nikal kar mujhe dekh rahi ho. Main kuch der tak wahin khada rehta hoon… seedha un jaliyon ki taraf dekhte hue —jahaan andhera nahi, ek aasha hoti hai.

Us waqt main bada nahi hota,
ek chhota sa baccha ban jaata hoon —
jo sirf itna chahta hai ki uske Baba usse khush rahein.

Aas paas koi nahi hota, sirf main, ek band mandir, aur ek unboli hui baat — jo Bhairav Ji sun lete hain.

🔱 Aapke Mann Mein Bhi Agar Darshan Ka Bhaav Utha Hai…

Agar yeh blog padh kar aapka bhi man Bhairav Ji ke darbaar jaane ko keh raha hai — toh rukiyega mat.

Yatra Engine aapke liye wahi yatra taiyaar karta hai — jo sirf safar nahi, ek anubhav ban jaaye.

Hum aapke liye organize karte hain:

• 🔸 Personalized Night Yatras (Bhairav Darshan + Kashi Vishwanath Shayan Aarti)

• 🔸 Scooty Tours through Banaras ki Galiyan

• 🔸 Temple Entry Coordination & Ritual Guidance

• 🔸 Ghat Walks, Darshan Routes, Local Satvik Bhojan

• 🔸 Hotels, Taxi, Flats, Luggage Trolley – Sab kuch ek hi jagah se

📞 Call/WhatsApp for Booking & Guidance:
📱 +91 9277286586
📍 Follow us: @yatraengine

✍️ Not Just a Journey… A Call from Within

“Bhairav Ji bulate nahi…

wo bas ek pal mein aapke mann mein baith jaate hain.

Aur agar aap tak woh bhaav pahunch gaya ho,

toh yeh blog sirf shabd nahi… ek sankalp tha.”

Jai Baba Kaal Bhairav Ji 🙏

Jai Kashi Vishwanath Ji 🔱

Har Har Mahadev!

 🔱 Yatra Engine 🔱 

 – Your Journey, Our Engine